Hierdie draad sluit bepaald aan by 'n ander draad ("Ateïstiese Christenskap"?), met 'n ander invalshoek en juis oor die feit dat mens dit so baie hoor. Daar is baie liberale Christene wat net op een noot hul geloof uit basuin en dit is, God is liefde en die hele waarheid is volgens hulle liefde. Dit kom basies daarop neer dat mens niemand mag veroordeel of enige oordeel mag fel oor hulle handel en wandel nie, want doen mens dit, is jy liefdeloos en veroordeel mens. Maar hoe benader mens so iemand? Ek het lank gewonder en in ‘n gesprek het dit sommer spontaan uitgekom en elkeen kan hier byvoeg en aanvul soos nodig, want mens kry dit nodig van tyd tot tyd. Is God werklik liefde, wil mens vra en veral as mens in ons liberale samelewing dit so baie hoor van mense wat Hom werklik nie ken nie. JA, moet elke gelowige se antwoord wees, want dit is tog wat die Bybel leer.
Geliefdes, laat ons mekaar liefhê; want die liefde is uit God, en elkeen wat liefhet, is uit God gebore en ken God. Hy wat nie liefhet nie, het God nie geken nie, want God is liefde.
(1Joh 4:7-8 AOV)
Tog bekommer dit mens dat daar mense is wat God 'lief' het, maar Sy Testamente wat Hy nagelaat het, verag. Hoekom sou dit wees? Dit kan net wees omdat hulle nie God se liefde ken nie en uiteraard kan mens seker redeneer dat hulle Hom ook nie ken nie.
Ek deel bloot my hart soos ek liefde verstaan en veral geloof verstaan, want beide liefde en geloof se uiteindelike doel, is om ons vlekkeloos voor God te bring om vir ewig en altyd saam met 'n Heilige God te kan wees. As God nie ons eerste liefde is nie, is daar nie liefde nie en dit is wat ek graag sal wil oorbring in hierdie skrywe. In Openbaring 2:4 staan daar in die brief wat Johannes volgens die opdrag wat hy van Jesus self ontvang het, dat Jesus dit teen die gemeente in Éfese het, omdat hulle hul eerste liefde verlaat het. Hulle het liewer vir die wêreld en wêreldse dinge geword, as vir Jesus self. Jesus sê onomwonde dat as ons lief is vir Hom, sal ons Sy gebooie bewaar.
Wie my gebooie het en dié bewaar, dit is hy wat My liefhet; en wie My liefhet, hóm sal my Vader liefhê, en Ek sal hom liefhê en My aan hom openbaar.
(Joh 14:21 AOV)
Daar is verskillende soorte liefdes en liefde persé, is nie noodwendig die antwoord om die waarheid te ken nie. Vergelyk die Griekse betekenisse, waar slegs 'agapé' 'n morele liefde is en hierdie liefde alleen verheerlik God.Om te weet Wie God is, het Hy die Heilige Gees en die Heilige Skrif vir ons gelaat, sodat ons Sy dieptes kan ondersoek. God het emosies, net soos wat ons emosies het en haat by God, het nie te doen met ‘n slegte gesindheid nie, maar het te doen met wat verkeerd is. God haat nie om destruktief te wees nie, Hy haat juis die slegte, sodat ons Sy liefde kan smaak, want slegte dinge het Hy nie vir ons bedoel nie. God is heilig en daarom moet ons ook heilig wees, ons moet ons eerste liefde eerste stel en eers dan, sal liefde, die ‘agapé’ liefde van God, ons deel word.
Mens kan net glo, dit wat jy weet en die Bybel se hele doel is bloot dit, om ons te stimuleer in ons geloof, want dit gee substansie aan ons geloof. Om liefde alleen as die maatstaf te gebruik vir die volle waarheid, is juis nie liefde nie. Hoekom sê mens so? Ons almal het of kan byvoorbeeld goeie ateïstiese vriende hê (ek het self ook ‘n paar) en mens wonder bloot, hoe lief is mens vir hulle, as jy nie die waarheid met hulle ronduit deel nie? Waar gaan ‘n ateïs eindig, as hulle nie dit wat jyself glo oor God, ook as liefde leef nie? Baie mense hou hierdie deel voor as die rede hoekom God liefde is, maar sien nie dat liefde eerstens begin by God en om Hom lief te hê nie…
En Jesus antwoord hom: Jy moet die Here jou God liefhê met jou hele hart en met jou hele siel en met jou hele verstand. Dit is die eerste en groot gebod.
(Mat 22:37-38 AOV)
Ken ateïste God, is hulle lief vir God? Is dit liefde, is natuurlik die groot vraag, as liefde by God begin, watter liefde het ‘n ateïs dan?
Jy kan nie vir jouself lief wees of vir ander mense lief wees, as jy nie heel eerste vir God lief het nie (jou eerste liefde) . Alles begin by God en daarom ook by die Bybel, want dit is God se Testamente wat Hy in geskrewe vorm agtergelaat het, sodat ons kan lewe in oorvloed. Daar is natuurlik veel meer in die Bybel as net die opsomming van die liefdes-gebooie, want dit wat veel meer is plaas perspektief op wat liefde werklik is. In Mat 22 staan daar die volgende,
Gaan dan op die kruispaaie en nooi almal wat julle mag vind, na die bruilof. En daardie diensknegte het uitgegaan op die paaie en almal versamel wat hulle gevind het, slegtes sowel as goeies, en die bruilofsaal het vol gaste geword. En toe die koning ingaan om na die gaste te kyk, sien hy daar iemand wat nie ‘n bruilofskleed aan het nie. En hy sê vir hom: Vriend, hoe het jy hier ingekom sonder ‘n bruilofskleed aan? En hy kon geen woord sê nie. Toe sê die koning vir sy dienaars: Bind sy hande en voete, neem hom weg en werp hom in die buitenste duisternis. Daar sal geween wees en gekners van die tande.
(Mat 22:9-13 AOV)
Hoe nooi ek en jy mense na die bruilof in LIEFDE, as ons nie aan hulle wys, hulle moet ‘n bruilofskleed aanhê nie? Gaan dit LIEFDE wees as God hulle bevind sonder ‘n bruilofskleed aan? Hier is die belangrike opdrag wat Jesus gegee het, seker die belangrikste opdrag wat suiwer en 100% net oor liefde gaan…
Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.
(Mat 28:19 AOV)
Leer hulle om alles te onderhou wat ek julle beveel het, staan daar. Dit is om die volle boodskap van die Bybel aan mense te leer, sodat God se liefde hulle deel kan word, want die Here self weet daar kom ‘n dag, waar niemand leeg voor Hom waag staan nie, jy sal ‘n bruilofskleed van liefde aan moet hê, want daar staan…
Want ons ken Hom wat gesê het: My kom die wraak toe, Ek sal vergelde, spreek die Here; en weer: Die Here sal sy volk oordeel. Vreeslik is dit om te val in die hande van die lewende God.
(Heb 10:30-31 AOV)
Vreeslik is dit om te val in die hande van ‘n lewende God, want God is heilig en Hy eis dat ons ook heilig lewe en slegs ‘n vrees vir Hom, m.a.w. respek vir Hom, maak Hom jou eerste liefde. Geen man en geen vrou kan lief wees vir hulle wederhelfte, as hulle nie ‘n vrees het om hulle wederhelftes se respek te verloor nie.
Huwelike werk net as die eerste liefde (die liefde tussen ‘n man en ‘n vrou), die heersende liefde is, want die kinders sal die vrug daarvan pluk. So kan ons huwelik met God net standhou as eerste liefde, sodat ander mense die vrug daarvan kan pluk. God voel so sterk oor hierdie eerste liefde, dat Hy die volgende daaroor kon sê…
HERE, en daar is geen ander nie; buiten My is daar geen God nie; Ek omgord jou, hoewel jy My nie geken het nie,
(Jes 45:5 AOV)
Maar die HERE is waarlik God, Hy is die lewende God en ‘n ewige Koning; vir sy toorn beef die aarde, en die nasies kan sy grimmigheid nie verdra nie—
(Jer 10:10 AOV)
En Jesus antwoord hom: Die eerste van al die gebooie is: Hoor, Israel, die Here, onse God, is ‘n enige Here; en jy moet die Here jou God liefhê uit jou hele hart en uit jou hele siel en uit jou hele verstand en uit jou hele krag. Dit is die eerste gebod. En die tweede, hieraan gelyk, is dit: Jy moet jou naaste liefhê soos jouself. Daar is geen ander gebod groter as dié nie.
(Mar 12:29-31 AOV)
Jesus self verklaar net voor die liefdesgebod, Hoor, Israel, die Here, onse God, is ‘n enige Here(!) en dit sluit perfek aan by wat reeds in die Ou Testament gesê is, in slegs twee van duisende voorbeelde, naamlik Jes 45:5 en Jer 10:10 hierbo en vergelyk dit met die eerste gebod, jy mag geen ander afgode voor My aangesig hê nie! Dit alleen is liefde, as ons nie ons eerste liefde verlaat nie.
Reply With Quote
Omdat jy hulle lief het, beskerm jy hulle, Omdat jy hulle lief het is daar grense gestel vir hulle........................., Omdat jy hulle lief het raak die lysie lank.. 
Originally Posted by Die Filadelfieer
Bookmarks