Die Koninkryk van God

[Kalahari]

Ek lees op die internet die volgende stelling wat iemand maak:

"Die Bybel is eintlik die mees misverstane boek op aarde. Hoewel dit 'n handleiding vir die mens is om God in beheer van die aarde te sit, (God se koninkryk hier te vestig), word dit gebruik om verskillende denominasies, gelowe, heersers en regeerings se eie agendas te verkondig.

Die Bybel is in vandag se terme God se konstitusie vir Sy koninkryk. Dit gaan oor 'n Koning. 'n koninkryk en 'n koninklike geslag, 'n koningkryk van liefde met mag en outoriteit om op aarde te heers.

Elke vorm van regering en geloof wat ons ken op aarde is net 'n poging van die mens om weer die outoriteit wat God aan Adam gegee het terug te probeer kry. God het nie vir Adam 'n geloof gegee nie. Hy het hom outoriteit gegee met die opdrag om te heers. Die Bybel gee vir ons die resep (soos Jesus dit gebring het) om God se koninkryk te vestig en die mens se outoriteit te herwin sodat God se wil op aarde sal geskied en die aarde soos die Hemel sal lyk."

Enige kommentaar?

[CFJ]

Kalahari,

As ek byvoorbeeld net na die aspek van God se beheer kyk, is dit iets wat ek aanklank by vind. Vir myself gaan alles oor God se beheer en ek dink juis dat 'n gebedslewe ten doel het om Sy beheer in ons lewens te laat manifesteer. Hoe groter die mens se nood, hoe meer soek hulle God se beheer. Sy beheer bring juis vryheid en nie gebondenheid nie en oor die algemeen is mense bang dat God se beheer hulle gaan kniehalter...

Oor die kwessie van Adam se geloof versus outoriteit, wil mens eers bietjie herkou, want ek glo dit is hoogstens 'n afleiding wat mens kan maak, alhoewel dit moontlik klink.

[Kalahari]

Ferdi

Ek dink mens moet onderskeid tref tussen God se beheer, Sy koningskap, en Sy koninkryk. Ons almal sal saam stem dat die ganse skepping onder God se beheer is, Hy is koning oor alles. God se koninkryk is egter daar waar Hy regeer en Sy onderdane dit aanvaar. Alhoewel God dus koning is, is Sy koninkryk enger as Sy koningskap.

Ek dink die Bybel kom vertel ons van die Koning en Sy genade. Hoe ons slegs deur geloof in Sy Seun Jesus gered kan word van die dood en weer lewend kan word as koningskinders. Alhoewel Jesus se koninkryk daar is waar gelowiges dit bely en beleef, glo ek egter nie dit is die mens se opdrag om die wêreld tot God se koninkryk te verander nie. God se koninkryk is nie van hier nie, ons stryd is nie teen vlees en bloed nie, maar teen die geeste van die lug.

Ons outoriteit wat ons verloor het, het Christus terug geneem. In Christus is ons dus ten volle verlos en het ons alle outoriteit. Dit moet ons egter toepas as dienaars en nie as heersers nie. Ons opdrag is om die Here te dien met al ons krag en verstand en om ons naaste lief te hê soos onsself. Ons moet die evangelie aan almal verkondig en dissipels van mense maak. Ons moet nie die aarde annekseer nie. God sal in die nuwe aarde heers in Sy koninkryk waar ons Hom op die troon sal sien. Hier moet ons gehoorsaam wees en bid dat Sy koninkryk sal kom, maar die Here sal self Sy koninkryk uitbrei. Ons is dienaars in die proses, maar dit bly Sy wil, nie ons s'n nie. Vir gelowiges sal alles goed verloop en hoef ons ons nie te bekommer oor die koninkryk nie. God sal voorsien en Hy sal heers.

Groete
Kalahari

[Die Filadelfieer]

Die Bybel is in vandag se terme God se konstitusie vir Sy koninkryk. Dit gaan oor 'n Koning. 'n koninkryk en 'n koninklike geslag, 'n koningkryk van liefde met mag en outoriteit om op aarde te heers.

Ek probeer my kop rondom hierdie stelling kry maar ek sukkel. Gaan Christenskap na Jesus se opstanding oor heerskappy of gaan dit oor bediening ?