HOEKOM hierdie forum ?

[Die Filadelfieer]

Hoekom hierdie forum ?

Ek dink dit is ‘n belangrike vraag om te vra.
As die Bybel nie ’n wetenskaphandleiding is nie, hoekom is dit nodig om wetenskap en die Bybel met mekaar te konnekteer ?
Die antwoord is heel eenvoudig :
Baie wetenskappe word beoefen met sekondêre redes. Bo en behalwe die soeke na nuwe kennis wil dit voorkom asof daar ’n daadwerklike poging is om God in die oë van mense dood te maak. Die boodskap word op kinders af-forseer by skole. As mens die TV aansit is daar ’n program oor evolusie wat vir ons spesifiek vertel hoe onmoontlik dit is vir God om die skepping tot stant te gebring het...en dit is juis hier waar die probleem lê.
Die probleem is nie met die wetenskap van evolusie per se’ nie, maar die manier hoe dit opgedis word aan die mense : ’n daadwerklike teenpool van die Bybelse skeppingsverhaal, en die Meganisme en metodiek van die skepping.

Hierdie forum dien mynsinsiens as ’n teenvoeter vir hierdie pogings, ’n plek waar mense sal sien dat Christen wees en die wetenskap nie noodwendig teenoor mekaar hoef te staan nie, en waar Christene kan sien dat daar wel ’n alternatief is vir sekulêre wetenskappe se “antwoorde”.

Daar bestaan ’n miskonsepsie onder veral aanhangers van sekulêre wetenskappe dat Christene sekere basiese feite negeer om hulle argumente te laat water dra. Verskillende dissiplines binne die uiters gekompliseerde veld van genetika is maar een so ’n voorbeeld. Hierdie forum gaan wys dat dit inderdaad nie die geval is nie. Die feit dat ons as Christene die bestaande teorië anders interpreteer, en nie goedmoeds inkoop op ’n idee waar God nie alles tot stand gebring het nie, is iets wat duidelik aan die lig sal kom, vir almal wat belang stel om te sien.
Dalk kan ons dit so uitbrei dat ouers en hulle kinders hierna verwys kan word vir alternatiewe antwoorde vir dit waarmee hulle daagliks gebombardeer word ? So ‘n uitkoms hang net van onself af, die lede van hierdie forum, en ek weet sommer ons gaan Lighuis NOG groter en gewilder maak as wat dit reeds is met die besluit om hierdie forum te begin.

Groete !

[Phil Fourie]

Ek maak hierdie draad 'n Sticky vir jou

[CFJ]

Dankie Fila... ek sien uit na die interessanthede wat bespreek gaan word en is oortuig dat veral tussen jou en Philip, hier baie insiggewende inligting aangebied gaan word.

[mastermike]

Re: HOEKOM hierdie forum ?

Filadefieer,

Dit is waar dat die wêreld ons teëstaan met die skepping van God, tog het ons nie genoegsame bewyse om hulle te oortuig na die maat van versadiging tot hul verstand nie. As christen glo ek vas in die woord want God se woord is ja en amen. As christene sal ons nooit betwyfel dat God die skepper van hemel en aarde is nie. Ongelukkig kan ek nou nie 100% saamstem dat die Bybel n handleiding vir die wetenskap is nie, alhoewel daar geografiese bewyse voorkom van gebiede wat was voordat dit vernietig is. Maar hierdie soort ontdekkings bring nie altyd geloof in sommige se harte nie wat ons laat besef dat die Bybel handel oor die geloof van die mens teenoor sy Skepper. Daar is hulle wat tot die geloof gekom het deur uitvindings en tog is die meerderheid daarteen gekant wat die bewys is dat God nie die Bybel gebruik om wetenskaplikes te probeer oortuig van Sy skepping nie, want hulle wat nie in Hom glo sal nie in Sy skepping glo nie.

Paulus noem dit in sy brief wat hy rig vir die gemeente van Korinthiërs. 1Kor. 2:14 Maar die natuurlike mens neem die dinge van die Gees van God nie aan nie; want dit is vir hom dwaasheid, en hy kan dit nie verstaan nie, omdat dit geestelik beoordeel word. Hier maak Paulus klaar die verskil tussen die geestelike en vleeslike persoon.

Dit is hartseer as ek die evolusie wat deur humanistiese oortuigings oorgelewer word, bevind dat die bedenklike normaliteit van insig totaal deur die bose oorweldig word, terwyl die persoon in oortuiging leuens verkondig om sy stelling te maak sodat hy die skare kan oorhaal met bedrog en sieninge van sy eie geloofwaardigheid. Die Bybel se dat die dwaas se in sy hart, daar is nie n God nie. Psalm.14:1 Die dwaas sê in sy hart: Daar is geen God nie. Sleg, afskuwelik maak hulle hul dade; daar is niemand wat goed doen nie. Dit is die optrede van alleenlik hulle wat teen God rebelleer.

Natuurlik kan ons nie almal onder dieselfde kam skeer nie, omrede daar hulle is wat deur die Bybel tog tot insig kom. Wat ek eindelik wil se is soos Paulus se: Ons wandel nie deur aanskouing nie, maar deur geloof. Die Bybel is gerig tot die geloof van die mens sodat ons in Hom kan glo en Hom kan vertrou ten volle. Hoe bewys jy aan iemand in die Bybel dat Jesus opgestaan het...as ons dit kon regkry was die hele wêreld alreeds gered. Jesus self het gesê toe Hy tussen die dissipels verskyn: Salig is hulle wat nie gesien het nie, en tog glo. Met ander woorde die Here verwag dat ons deur geloof na God moet kom en in geloof wandel en volhard tot die einde toe. Ek weet ek klink nou baie pessimisties oor hierdie saak, maar ek probeer net toon dat wetenskaplikes nie graag die Bybel as bewysstuk wil aanneem om hul teorie te bevestig nie.

Daar is wetenskaplike christene wat alleenlik God die eer gee vir enige uitvindsel of kennis wat hulle opdoen want hulle weet Hy het alles gemaak. Mag die Here hulle seën en mag Sy hand op hulle wees. Mag Hy hulle lei na hoër hoogtes en eer aan hulle gee. Mag Hy hulle bewaar by hulle ingang en by hulle uitgang tot in ewigheid.

Ek sal verheug wees as die Bybel tog n handleiding kan wees vir hulle wat ons kinders probeer vernietig met leuens en bedrog, sodat ons kinders die waarheid kan aanneem en daarby hou. Ek probeer gereeld met die kleinkinders praat en waarsku oor die evolusie bedrog, tog vind ek die groot gevaar dat as hulle nie die vak bemeester van evolusie nie sal dit hulle in die toekoms benadeel vir punte in die eksamens. Kan jy glo dat die duiwel dit sover reggekry het om ons skole te integreer en beheer met hul leer van evolusie.